كم مرة في الشهر تصحى من النوم وتقرر إن مزاجك محتاج يطلع اليوم في نُزهة؟
وكم مرة تتكنسل هذي النُزهة بسبب جِبال المهام عندك واللّي لازم تنجزها بدون تأجيل؟
طيب لو قلنا لك إنك تقدر تطلع في نُزهة مو يوم في الشهر ولا يومين، كل يوم! ومن دون ما تأجل مهامك أو تلخبط جدول مواعيدك، كيف؟
لما تروح كل يوم لمكان عملك، واللّي هو بشكلٍ ما مكان تصنع فيه أفكارك، هذا المكان هو بالضرورة مكان لنُزهة ذاتك الفنانة! لولاها كنت حسيت بالفراغ وعدم الإنجاز..
هذا على مستوى الفِكرة أما على المستوى الحِس، جايبين لكم خبيرتنا رهف أخصائية هدايا في فريق رسيل تخصص تصميم داخلي، وراح تعطيك أهم الأشياء اللي ممكن تسويها في مكتبك وتخليه مكان لنُزهة روحك وبصرك.
تقولك رهف إن أهم شيء لازم يكون موجود في روح المكان هو الانتماء له والانتماء أساسه نُقطتين الراحة والشخصية، السؤال المُهم كيف تخلي مكان عملك مُريح؟ لخصناها لك في نُقاط:
-راحة في جلستك: ممكن تضيف على كرسيك وسادة خاصة بالظهر ووسادة تحت، ومهم يكون تحت رجلك مسند للأرجل يخليها مرتفعة بطريقة تحرك الدورة الدموية خصوصاً للي يقضون أوقات طويلة على المكتب بدون حركة.
-راحة في نظرتك: وهذي تكون في اختيارك للألوان دايم اختر لون مريح للعين ويتناسب مع هوية المكان والعمل، وأيضاً ممكن تخلي جهازك على ”الوضع الليلي“ أريح وأسلم لنظرك.
-راحة في شغلك: من أهم الأشياء إنك تسوي شغلك وأنت مرتاح ومركز فيه بدون تشتت، وهذي حلها بالمنظمات، وفي السوق كثير منظمات وتقسيمات بأفكار وتصاميم حلوة ومناسِبة.
-راحة في الجو العام: هذي تكون على حسب مكانك، مثلاً ضروري يكون فيه ضوء شمس داخل على المكان، ولو مو متوفرة تقدر تستبدلها بإضاءة (ضوء النهار) تعطي نفس الشعور، واحرص تختار اللي تكون متناسبة مع نوعية عملك إذا عملك يحتاج تشوف كل شيء بشكل واضح ويوضح العيوب تختار اضاءة بيضاء موجهة، وإذا عملك مكتبي فممكن إضاءة جمالية تدخلك جو الإلهام والتحفيز.
وحاول تعطر المكان دايم، بفواحة، بالبخور، بالشموع أو بأي شكل تحبه دايماً الروائح الحلوة تعطي شعور مريح ورايق،مع تهوية المكان حتى لو ما كان فيه شباك ممكن يصير الباب مفتوح، وتقدر تضيف النباتات لمكتبك تعطيه حياة ومنظر مُنعش.
بالنسبة للشخصية هي لما تضيف لمستك في المكتب حتى إذا شفته تحس بنفسك فيه، وهِنا مكان لإبداعك وأفكارك..
ممكن تضيف جدول مهام من تصميمك أو تضيف صورة حلوة، تكتب أو تطبع عِبارة محفزة أو كلام من شخص عزيز عليك، ممكن تضيف قطع من اهتماماتك الشخصية بشكل مناسب وبنفس الوقت مُسلي، ممكن تحط انجازاتك أو أي شيء يدل عليها ميدالية أو صورة
المجال هِنا لك ولفنك!
بالنهاية الانتماء وروح المكان راح يخلون كل يوم في دوامك له طعم نُزهة مختلفة، وإن شاء الله التدوينة كانت مفيدة لكم شاركونا أفكاركم وكيف تنعشون مكان عملكم في التعليقات وأكيد نستقبل كل أسئلتكم ومقترحاتكم ???
