أهلاً أهلاً بأصدقاء رسيل..

معكم نورة من فريق العمليات ??‍?

وشهد من فريق التسويق??‍?

ودنا نسولفلكم اليوم عن تجربتنا البسيطة مع النظام النباتي.. ونشرح لكم الوضع من نظرتين نختلف في بعضها ونتفق

أهم شيء خذوا الموضوع بأريحية وكلوا برقر دجاج وأنتم تقرون التدوينة??

بدايةً أول سؤال ممكن نجاوب عليه ليه صرنا نباتيين؟ ?

نورة كان عندها مشاكل في فقر الدم وكان العلاج إنها تاكل لحوم بشكل أكبر.. وصار الموضوع عكسي عليها 

وشهد قامت من النوم ومسّكت معها تكون نباتية وتجرب الموضوع لفترة من الزمن.. 

 قرار إننا نكون نباتيين، غير مخطط له وما كان في بالنا إنه بيكون نظامنا الأساسي .. 

طيب هل نحس إن النظام صعب؟ 

شهد اللّي قررت تصير نباتية فجأة تحس إنه كان صعب عليها الموضوع خصوصاً فراق الشاورما??

 وكيف إنها اصلاً مو متخيلة أيام خالية من جُملة “ثنين حبة شاورما وكثر مخلل ومايونيز” لكن نقول إنها تجاوزت مع الأيام..

نورة تشوفه مو صعب أبداً (متسممة من شاورما?) 

وبالعكس تشوف أن نظام أكلها صار غني أكثر ✨

الشيء اللّي اتفقنا عليه إن النظام من تبدأ فيه راح تحس إنك أصفى ذهن، وكثرة الألياف بتعطيك شعور بالراحة أكثر.. فنصحيتنا لكم دوروا أصدقاء نباتيين لأنهم دايم رايقين ووسيعين صدر وبال??

كونك شخص نباتي يخليك تتمتع بمميزات خاصة منها:

-نادراً تلقى أحد يسرق أكلك ?

-أهلك بالبيت بيخلون لك أي أكل من باب إنهم راحمينك

-نظام أكلك موفر عليك وماتطير فلوسك ? 

-تصير طباخ بالفطرة لأنك راح تطبخ أكلك بنفسك وماعليك  لو جبت العيد يمديك ترقعها ببهارات ولا صوص???‍?

-ذائقتك في الأكل راح ترتفع وراح تصير تحرص على جودة مصادر أكلك مثل القمح نحرص يكون كامل ومايكون مرشوش عليه أي مبيدات 

-دايم بتصير الشخص اللي عنده سالفة ومشعلّل النقاش في المجلس (متعة خفية في الموضوع حتى لو كان النقاش حاد?) 

-شخص يمشي والبيئة بكبرها راضية عليه?✨ 

وأيضاً كونك شخص نباتي ماراح يخليك تسلم من تعليقات الي حولك وأسئلتهم..

-شعركم مايطيح؟ 

-أكلكم مايشبع?

-صحنك ناقص?

-أحد يعاف اللحم؟ (دايماً يكون القائل شخص معه سكينة وقطعة ستيك للإغراء)

والانهيار الحقيقي لما يوصفون نوع اللحم اللي ياكلونه: “تعالي كلي معنا لبّاني (عجل صغير) مامشى ولاخطوة ماخذينه من تحت بطن أمه” ???

آخر نقطة ودنا نقولكم وش غير فينّا النظام النباتي?

متفقين إنه خلانا أكثر وعي لأشياء كثير..

بالبداية كان بس نظام لنفسك وصحتك لكن بعدها العادات الصحية صارت تجر بعض.. 

وأكيد أي نباتي هو صديق للبيئة بالفطرة، لذلك دايم يتأمل في عاداته وتعامله مع البيئة.. النظام بيعطيك شعور المسؤولية تجاه بيئتك وراح تحرص تحافظ على الأشياء من حولك.. بتقلل من استخدام البلاستيك ومراح تكون شخص استهلاكي، ودايم بتلجأ للحلول المستدامة، بتحرص على الرياضة والأكل الصحي المُفيد.. ?

وفيه نقطة مشتركة إننا  قاعدين نحس بانتماء للنباتات من بدينا النظام وحنا مشغلين العالم كل يوم نبتة جديدة وواضح إننا بنفتح مشروع مشتل ??‍?

وبس هذي كانت تجربتنا حبينا نقولها لكم بشكل بسيط ومختصر.. أنتم شاركونا تجاربكم مع النظام النباتي ولو عندكم أسئلة أو فضول أكثر اكتبوا لنا في التعليقات وراح نجاوب عليكم??