هلا هلا براعين المواجيب واللّي يدورون الزين في هداياهم وأفكارها????
تدوينتنا ريحتها بودرة وأشياء لطييفة بما إنها عن هدايا المواليد ???
بتستمتعون معنا وأنتم تفكرون لتجهيز هدايا المواليد عندكم ..
بنساعدكم في كم فكرة وملاحظة تشيل عنكم الحيرة وتفتح المجال لإبداعكم أكثر وإضافاتكم الخاصة والمُميزة?
طبعاً في البداية حددوا لمين بتكون الهدية.. للأم أو للمولود أو لهم كلهم.. إذا حددتوا راح يسهل عليكم البحث، وهنا نلخص لكم أهم وأبرز المنتجات اللي تجمع بين الهديّة الحلوة والهديّة المفيدة من وجهة نظرنا ?
-حقائب التنظيم: جداً هديّة مُفيدة وممُيزة.. بما إنها أكثر فترة تحتاج فيها الأم للترتيب في طلعاتها السريعة، وأغراضها وأغراض المولود كلها بتكون أرتب وأريح لو جتها هديّة من المنقذين أمثالكم مع التقسيمات المُناسبة والمتنوعة.. وممكن تختارون لها أنواع وأشكال من التقسيمات يكون مثلاً فيها جيوب أو عدة ألوان أو تصاميم عشان تفرق بينهم من بعيد وو….إلخ
-المذكرات والألبومات: هدية حلوة ومعناها أحلى.. تخيل تكون جزء من ذكريات أم وطفلها، المراحل اللي يمر فيها الطفل والتغيرات والأحداث السريعة العابرة في فترة طفولته كلها تستاهل التوثيق ومثل هذي المذكرات الخاصة بالأطفال تسهل عملية التدوين للأم وتحفزها.. وحتى الألبومات خصوصاً اللي يكون فيها فكرة لكل صورة في الألبوم.. مثل الملصقات والفلاتر أو المستلزمات المصاحبة لتصوير المولود.. وممكن تسوون إضافة حلوة وتحطون قائمة بعبارات من تعبيركم أو تعليقات عفوية لتصوير الطفل مثل “يازاهي الخدين والبسمة عجب” يصير تضيف معها صورة لابتسامة الصعنون وملاحظتك موجودة وباقية ذكرى مع الألبوم?
-منتجات العناية: العناية وما أدراك ما العناية دايم نقول إنها المنتجات المنقذة لأغلب المناسبات??♀️?
لكن في هدية المواليد منتجات العناية زي رسالة استجمام إنك تبين تدلعين الأم وتخلينها تنتبه لنفسها في غمرة التعب والإنشغال.. غالباً كل أنواع منتجات العناية يأدون الغرض مثل اللوشن، الماسكات، الشموع المعطرات بدعوا فيها وخلوهم يسترخون.. أو جلسة سبا تجدد طاقتها لنفسها ولطفلها ??♀️
وممكن تكون عناية للطفل بس تختارونها بعناية وشمول عشان مسألة حساسية الأطفال، وممكن تاخذون المنتجات اللّي تكون زي الأغراض الشخصية الصغيرة مثل العناية بالأظافر، فرشة صغيرة، مجموعة كريمات وشامبو ??
-الألعاب: إذا ودكم تكون الهدية للمولود نفسه اختاروا الألعاب الخشبية تبقى وتدوم أكثر من البلاستيك.. أو الدمى، ارتباط الطفل فيها أكثر ويابختك إذا صارت هديتك دُميته المفضلة لما يكبر ?
وأهم فقرة جمعنا لكم أفكار غير مُعتادة لهدايا المواليد باستشارة خاصة من أمهات مجربات:?
– أجهزة طهي الطعام بالبخار للطفل وعلب تقسيم الأكل
– جهاز ترطيب الجو لغرفة الطفل
– كاميرا لغرفة الطفل ( مراقبة )
– عربية بمواصفات ممتازة وعملية بالفتح والإغلاق وتركب الطيارة ?( أهم شيء لا تجيبون مشاية? )
– ممكن صندوق يكون فيه مجموعة أشياء مفيدة للأم والطفل (فيتامينات رضاعة للأم – أداة تنظيف الأنف – غطاء رضاعة – قطعة لبس للمولود – بطانية بحرف أو اسم المولود – مذكرات للطفل – ألبوم صور ) ✨
– الذهب للمولودة حلو .. ممكن اسوارة للأم والمولودة عموماً فكرة الطقم حلوة استغلوها حتى لو ملابس?
– مستلزمات تصوير المولود من أول شهر إلى سنة .. تجي كروت أو شراشف أو لبس .. شهر .. شهرين .. ٣ ???
-جلسة تصوير للمولود ?
-حجز سبا للأم أو استشارة هاتفية ?
-إضاءة حلوة ومناسبة لغرفة الطفل ?
إن شاء الله تكونون استمتعوا بتدوينتنا وأضافت لكم شيء جديد.. أنتم شاركونا تحت في التعليقات أفكاركم وتجاربكم لهدايا المواليد وخلونا نستفيد من أفكار بعض ?
أو إذا عندكم أي استفسار اكتبوه لنا وراح نرد عليكم??
